Eqqaamasiuk sooq qinersissanersugut – aamma eqqaamallugu qinersisariaqaravit

Folketingimut qineqqusaarnerup nalaani amerlaqisut aperisarpaannga sunik suliniuteqarniarnersunga napparsimasut atugaat pitsaanerulersikkumallugit. Aperineqartarpunga meeqqat atuarfiani meeqqerivinnilu pissutsit pitsanngorsarniarlugit sunik suliniuteqarniarnersunga. Aamma aperineqartarpunga Nuummi angerlarsimaffeqannginnerup ajornartorsiutaanera qanoq iliuuseqarfigniarneringa.

Sooruna innuttaasunit ernumasunit apeqqutit akinissaannut piffissaqarniartarpunga tamatigulli oqaatigisarpara pineqartut uangut nammineq Inatsisartuni kommuninilu akisussaaffigigigut. Taakku allallut ulluinnarni inuunitsinnut tunngasut nammineq aquppagut taakkuunngalu Folketingi oqaasissaqanngilaq.

Folketingimi sunniuteqarfigisinnaavarput nunarsuarmioqatinik suleqateqarneq, immikkoortuni uangut nammineq suli tigusimanngisatsinni aamma immikkoortuni ingerlatatsinni naalagaaffik suleqatigalugu.

Tassa imaappoq Folketingimi sulissutigisinnaavarput inuit piliaannik silap pissusaata allanngoriartornera akiorniarlugu sapinngisamik annerpaamik sunniuteqarsinnaanissarput Sulissutigisinnaavarput ullumimut naleqqiullugu nunatsinni pinerlussimasut pineqaatissinneqartalernissaat.  Sulissutigisinnaavarput danskinut qaammarsaatigissallugu Kalaallit Nunaat nutaaliaasoq suunersoq, taamaaliornitsigut isummat pigiliutiinnakkat nungusarsinnaajumallugit. København aallaavigalugu Danmarkimi kalaallit tamaasa oqaloqatigisinnaavagut siunertalugu paasinissaa sooq Danmarkimi najugaqarusunnerunersut angerlaratik. Kalaallit Nunaannut attuumassuteqartunik inatsisiliornerit tamaasa sunniuteqarfiginiarsinnaavagut aamma ukiumoortumik aningaasanut inatsisiliortarnerit – tassuunakkullu qularnaarlugu Kalaallit Nunaanni immikkoortunut oqartussaaffimminut naalagaaffiup  ataqqinnilluni pissusilersornissaa immikkoortunullu  akisussaaffimminut naalagaaffiup paarsinerlunnginnissaa.

Allatut oqaatigalugu Folketingimi suliassanik ulikkaarpoq, taamaakkaluartorli suliassat amerlanersaasa Inatsisartuni kommuninilu aaqqiivigineqarnissaat nammineq akisussaaffigaarput.

Kaammattuutigissavara qinersisartut qinersiartussasut uangalu nammineq neriuutigaara Demokraatineersumik qinersiumaartusi. Kalaallit Nunaata soqutisai illersorniarlugit ilungersussaagut aamma Folketingimi Kalaallit Nunaannut ersarissumik sullissisuussaagut.

Apersuerusukkuit paasisaqarnerorusukkuilluunniit attavigisinnaavarma uunga sianerlutit 23 98 23.

Inussiarnersumik inuulluaqqusillunga
Steen Lynge
Demokraatit sinnerlugit Folketingimut qinigassanngortittoq