D: Kikkunuku imminnut tunereersut?

Soqutiginassaaq paasissallugu partiit sorliit Folketingimut qineqqusaarnermut atatillugu danskit partiivinit aningaasanik taperneqarsimanersut taamaasillutillu partiinut aalajangersimasunut qilersoreerlutik. Demokraatini isumaqarpugut qinersisartut tamakku paasissallugit pisinnaatitaaffeqartut.

Demokraatini ukiorpaalussuit matuma siorna De Konservativit suleqatigissallugit isumaqatigiissuteqarfiginikuuagut kingornali De Radikalet suleqatigissallugit isumaqatigiissuteqarfigivagut. Taamaakkaluartorli partiinit taakkunannga aningaasatigut ikiorneqanngisaannarnikuuvugut. Killiffipput massakkut imaappoq arlaannaannulluunniit qilersorsimanngilagut, danskit partiivinut imaluunniit Danmarkimi politikkernermi saamerlerliit talerperliilluunniit suleqatiginissaq pillugu isumaqatigiissuteqannginnatta.

Taamatut kiffaanngissuseqarnerput atussavarput politikkikkut sunniuteqarniarnissamut Danmarkimi saamerlerliit taperlerliilluunnit ajungaassagaluarpata. Isumaqatigiinninniartassaagut Kalaallit Nunaat pillugu sinaakkutissanik pitsaanerpaanik pissarsiniarluta aamma kalaallit pillugit ilanngullugit innuttaasut ilaat Danmarkimi najugaqarallartut ilinniarnertik napparsimanertilluunniit pissutigalugu tappavaniikkallartut.

Kisianni partiit allat qanormita inissisimappat? Kikkut danskit partiivinik siumoortumik isumaqatigiissuteqareernikuuppat aamma taakku partiit Danmarkimi suleqatiminnit qanoq amerlatigisunik aningaasanik taperneqartarpat?

Nalunngilarput Siumup isertuutinngikkaa Socialdemokraatinut naqitanngortitamik isumaqatigiissuteqarnikuullutik. Tamanna aamma Siumup nammineq aalajangigassaraa kisianni tamanna Siumup qanoq aningaasanik akissarsissutigisarpaa aamma taamatut periuseqarneq isumaqatigiinniarnerua eqqortoq? Demokraatini isumaqarpugut taamaanngitsoq.

Demokraatini isumaqarpugut partiit uppernassuseqarnavianngitsut oqassagunik kikkulluunniit isumaqatigiissuteqarfigisinnaallugit peqataanillu danskit partiiviniit aningaasanik tapiissutisisarlutik. Isumaqarpugut danskit partiivinit aningaasanik tapiiffigineqarnissamut isumalluuteqarneq tulluanngitsoq oqassagaanni kiffaanngissuseqarluni isumaqatigiinniartoqarsinnaasoq.  Aamma isumaqarpugut isumaqatigiinniarnerni pitsaasumik angusaqarnissaq periarfissarissaarnerussasoq suleqatigiinnissamut isumaqatigiissuteqareersimanngikkaanni aamma tassunga atatillugu aningaasanik tapiissutisisarsimanngikkaanni.

Paasisaqarnerorusukkuit imaluunniit apersuerusukkuit Folketingimut qinigassanngortittoq Steen Lynge attavigisinnaavat uunga sianerlutit 23 98 23.

Inussiarnersumik inuulluaqqusilluta.
Demokraatit