Inuusuttunnguaq silaannaap pissusaa illersussallugu kajumissuseqarluartoq Demokraatit sinnerlugit sassarpoq

Sascha Blidorf, Nuummi GU-mi atuartoq, Demokraatit Folketingimut sassartitaasa sisamarissavaat kingullersaralugulu.

Demokraatini nuannaarutigeqaarput Folketingimut qinersinermut atatillugu sassartitassatta kingullersaat arnaq inuusuttunnguaq, nukittooq, isumatooq tunniusimasorlu nassaarigatsigu.

“Isertussanngilarput Sascha piffissami sivisuumi piukkussimagatsigu. Sunut tamanut attukkaminut tunniusimasuuvoq, pikkorilluinnartuuvoq Demokraatinilu piginnaasai atorluarusoqaagut. Aamma kikkut tamarmik Kalaallit Nunaanni najugallit nuannaartorisariaqaraluarpaat. Sascha sassartitatsinnut ilanngummat tikilluaqqungaarpara, oqarpoq Randi Vestergaard Evaldsen.

Sascha Blidorf inuppassuarnik ilisarisimaneqalerpoq atuaqamminut siuttuulluni silaannaap pissusaa illersorumallugu Nuummi marsi qiteqquttoq akerliussutsimik takutitseqataammat. Sascha aamma Danmarkimiit uteqqammerpoq ilaatigut Folketingimi danskit politikeriinut erseqqissaassutigereerlugu nunatsinni silaannaap pissusaata allanngoriartorneranit qanoq ulorianartorsiortinneqartigisugut.  Aamma Foleketingmut qineqqusaarnermini silaannaap pissusaa pingaarnerpaatillugu sammissamaarpaa.

” Allatulli nunarsuup sinnerani inuusuttorpassuartut quarsaarutigaara, politikerit allallu silaannaap pissusaanik ulorianartorsiortitaalinnginnissarput akiorniarlugu taamma iliuusikitsigisimammata. Nunarsuup qanoq ittup qitornatsinnut tunniunnissaa eqqarsaatigalugu uanga kinguaariinnut ernumalluinnartunut ilaavunga. Isumaqarpunga maannakkut politikerigut nuimasut ilaginnaasimasut aamma isumaqarpunga, allarluinnarmik periuseqarluta ingerlaqqittariaqartugut silaannaallu pissusaa pingaarnerpaatut inissillugu oqallisigisariaqaleripput. Uanga tassani suleqataarusuppunga aamma qineqqusaarnermi qularnaarusuppara mingutsitsinnginnerulluta pilernissatta nipangiutiinnarneqannginnissaa. Tamanna pingaartorujussuuvoq, ” oqarpoq Sascha Blidorf,  taanna qilanaarpoq Demokraatit folketingimut sassartitaannik allanik qineqqusaaqateqarnissaminut.

Sascha Blidorfip saniatigut  Nivi Olsen, Steen Lynge aamma Jens-Christian Jacobsen Demokraatit sinnerlugit folketingimut qinigassanngortipput.

Paasisaqarnerorusukkuit uku attavigisinnaavatit:

Randi Vestergaard Evaldsen: 55 05 24
Sascha Blidorf: Mobil: 550570, Mail: [email protected]

Inussiarnersumik inuulluaqqusilluta
Demokraatit